馬體會搶分打劫畢爾包

2021-3-10 14:14| 发布者: soti008| 查看: 43| 评论: 0

摘要: 今晚西甲補賽，1哥馬體會主場硬撼畢爾包。馬體會上仗打吡戰臨尾香失分，好彩前鋒蘇亞雷斯重拾射門鞋，而且主場出擊食住畢爾包，為爭冠今仗不容再失，主勝有計。（Now 632周四凌晨2時直播）馬體會於日前首都打吡大好 ...

今晚西甲補賽，1哥馬體會主場硬撼畢爾包。馬體會上仗打吡戰臨尾香失分，好彩前鋒蘇亞雷斯重拾射門鞋，而且主場出擊食住畢爾包，為爭冠今仗不容再失，主勝有計。（Now 632周四凌晨2時直播）

馬體會於日前首都打吡大好形勢下，於末段被皇馬逼和1比1，痛失2分堅唔抵，依家領先次席巴塞3分，並且打少1場，如果今仗贏波的話，就可甩開至6分，進一步鞏固領先優勢，戰意唔使懷疑。箭頭蘇亞雷斯上仗先開紀錄，唔單止係佢今季聯賽第17個士哥，僅次於巴塞隊長美斯，亦打破之前5場入球荒，信心返晒嚟。主帥施蒙尼自接掌馬體會後，已帶隊贏過308場勝仗，追平已故球隊傳奇教頭阿拉干利斯，若今仗擊敗畢爾包即破紀錄，成為馬體會史上贏波次數最多嘅主帥，眾將必搏盡為施帥贈興。

客軍近況回落靠唔住
畢爾包自馬些連奴中途上任後，近16仗法定時間取得7勝7和僅2敗，包括勇奪西超盃，以及殺入西盃決賽，戰績絕對唔失禮。不過單計近9仗只得2勝，表現確有回落迹象，例如上仗擊敗CF格蘭納達，老將魯爾加西亞更罕有射失12碼，贏得驚險，加上中堅恩尼高馬天尼斯早前對利雲特做「紅牌阿姑」，被重罰停賽4場，今仗要繼續服刑，難免令防守受削。翻查紀錄，馬體會近5次聯賽主場迎戰畢爾包，全部贏晒，擺明格食格，主勝有買趁早。