请选择 进入手机版 | 继续访问电脑版

搜体网

金块快艇狭路相逢

[复制链接]
发表于 2020-12-25 16:32:19 | 显示全部楼层 |阅读模式
2-201225144442643.jpg
金块同快艇实力难分高下。

  NBA每年嘅圣诞大战都系高潮浪接浪,而今年较早开波嘅4场虽然都足够令观众大饱眼福,不过讲到最具话题性,睇嚟都系金块同快艇嘅压轴对决。相信大家都记得上季季后赛第二圈两队足足7个回合嘅厮杀几咁荡气回肠,时隔3个月彼此人手都有唔同程度变化,不过综合各方面嚟睇今季都属于西岸顶级劲旅。咁究竟今次邂逅系金块如愿扞卫主场尊严,抑或系快艇一雪前耻吐气扬眉?

  上赛季复赛之后所有比赛都喺奥兰多迪士尼世界展开,季后赛当然唔例外,呢段特别旅程注定系难忘嘅历史。讲到令人印象深刻嘅对决,西岸准决赛金块对快艇真系经典,当中最主要元素有两点——李华士(Doc Rivers)执教嘅球队又一次惨遭「3比1崩盘」,以及金块连续2圈实现「1比3翻盘」。成王败寇,即使金块最后止步西决,不过佢哋呢班新力军嘅演出已赢得无数掌声;而快艇建队初想就系为咗踩住湖人登上王座,偏偏未见假想敌就提前放假,下场难免令人啼笑皆非。

  两队交锋主角无非系各自嘅「孖宝」,金块有N.祖基奇同J.梅利,而快艇就系李奥拿德同P.佐治,如无意外呢场圣诞大战都系四位球星主演。回顾3个月前嘅系列赛,N.祖基奇均场可以贡献24.4分、13.4个篮板外加6.6次助攻,全能型中锋本色展露无遗,快艇根本冇佢符;J.梅利均场21分中规中矩,但决胜局独领风骚斩获40分彰显大将之风。李奥拿德都几全面,均场24.2分、8.6个篮板以及5.9次助攻掌控球队命脉;P.佐治较为起伏,除咗G3同G6其他场次都唔够30分,可以话系球队出局嘅暗涌。虽然快艇锋线牌面豪华,无奈团队太依靠佢两位,整体稳定性实在唔及金块,而两位掌舵人喺抢七大战齐齐失魂(合得24分),唔输就怪。

  言归正传,虽然季后赛边个都输唔起,不过宜家重新嚟到常规赛碰面应该缓和下之前嘅紧张气氛。睇返过去3个赛季10次交锋,金块同快艇都系各赢5次,其中前者上季录得1胜2负、前季3胜1负、2017-18赛季系1胜2负,5个主场成绩系3胜2负,老实讲真系分唔出边队占到上风。

  金块今季主力阵容冇乜大变,可能失去谢拉米格兰令人觉得可惜,不过都系为咗安排米高波达上位。后备席深度照旧,W.巴顿、蒙特摩里士等人都系冲击力十足嘅侧翼,来自皇马嘅甘柏素可以成为第二阵容指挥官。喺新赛季首战,N.祖基奇又一次贡献豪华大三元值得大赞,米高波达不负所托证明自己可以坐稳正选位置;但估唔到加时最后时刻畀帝王补篮封喉,后场双核J.梅利同加利夏里士全场梦游责无旁贷,趁着圣诞大战备受瞩目一定要尽快搵返手感,万一开季两连败,睇怕嚟紧条路都唔易行。

  另一边厢,虽然最佳第六人夏利尔过档湖人,好彩有老将巴杜姆同总冠军级内线伊巴卡加入,升级防守强度自然提高整体实力。不过要注意,虽然揭幕战打赢卫冕冠军确系威到尽,不过有睇波嘅朋友应该记得快艇主要系靠P.佐治手感火热,唔知佢今铺可唔可以延续上仗嘅命中率咧。其次,上仗几名后备总共只得29分,而志在练兵嘅湖人几个后备加埋攞咗46分,多少反映出快艇阵容深度有所倒退。最后一个疑问,快艇本身缺少组织专家,休赛期居然唔针对性补强,呢个亦都系点解抢七输畀金块嘅最大问题。比华利纯粹系防守工兵,路易斯威廉士同烈治积逊嘅特性大家心照,唔通要旨意巴杜姆客串?可能最实际打法系指望P.佐治同李奥拿德轮流单骑闯关啩,劳尔(Tyronn Lue)嚟嚟去去系得一两道板斧。

  伤停情况,金块人手齐整,快艇后卫积史古比因伤缺阵但影响唔大。


您需要登录后才可以回帖 登录 | 立即注册

本版积分规则

快速回复 返回顶部 返回列表